Gjykata Themelore në Prizren ka caktuar masën e paraburgimit prej 30 ditësh ndaj 30-vjeçarit F.B., i cili dyshohet se ka privuar nga jeta nënën e tij, T.B., në fshatin Restelicë të Dragashit.

Në njoftimin e Gjykatës bëhet e ditur se ndaj të dyshuarit është urdhëruar kryerja e ekzaminimit psikiatrik. Sipas urdhëresës, ekzaminimi duhet të realizohet sa më shpejtë të jetë e mundur, por jo më vonë se dy javë nga data e lëshimit të urdhëresës.

Pas përfundimit, raporti dhe ekspertiza do t’i dorëzohen Prokurorisë Themelore në Prizren dhe gjyqtarit të procedurës paraprake.

Ky vendim vjen pas kërkesës së Prokurorisë Themelore në Prizren, e cila ka kërkuar caktimin e paraburgimit në afat prej 30 ditësh për të dyshuarin F.B., i cili ndodhet në ndalim 48-orësh, për shkak të dyshimit të bazuar se ka kryer veprën penale “Vrasje e rëndë”.

Sipas prokurorisë, ngjarja ka ndodhur më 20 janar 2026 në Restelicë të Dragashit, në shtëpinë familjare ku jetonte bashkë me viktimën. Në njoftimin e Prokurorisë është bërë e ditur se viktima fillimisht është goditur me grushte në pjesë të ndryshme të trupit, ndërsa më pas është shtrënguar për fyti me duar, me ç’rast ka ndërruar jetë në vendin e ngjarjes./Arbresh.info